ما قصة المثل القائل { الموضوع فيه إنّ }

يثير الشكوك حتى يقول الناس عليه أنه شخص ذكي.
تعرف على قصة مثل في المشمش
يوم 9 يناير هو يوم المشمش في أمريكا وبالمناسبة دي حبينا نتكلم عن المثل المصري الأصيل في المشمش.
ناس كتير بتستخدم جملة في المشمش لما تبقى فيه حاجة مش عاجباهم أو حاجة شايفينها مستحيلة أو مش هتحصل أو عايزين يماطلوا أو يأجلوا أو للتعبير عن صعوبة الحاجة أو استحالتها.
بس إيه بقى أصل الجملة دي أو قصتها بدأت منين
فيه أكتر من قصة شعبية اتكتبت واتقالت عن جملة في المشمش.. زي مثلا إن المشمش من الفواكه اللي عمرها قصير جدا في السوق لدرجة إنها ممكن تفضل في السوق لمدة شهر واحد في السنة.. وزمان لما كانوا بيسألوا البياعين عن الضرايب كانوا بيردوا يقولولهم في المشمش.. يعني موسم المشمش الجاي بمعنى ربنا يسهل فوت علينا موسم المشمش السنة الجاية ده لو لاحظته أصلا.

من ضمن القصص اللي اتقالت عن المثل بس مانتشرتش أوي هي إن المثل بيرجع لقرية العمار الكبرى في القليوبية اللي بتعتمد بالأساس على محصول المشمش فكان لما حد يبقى عايز يعمل فرح ابنه أو بنته كانوا بيتفقوا إن الفرح يحصل في المشمش يعني وقت محصول المشمش.
لكن أكتر قصة انتشرت هي القصة اللي كتبها الأديب والكاتب أحمد أمين في كتابه قاموس العادات والتقاليد والتعابير المصرية وهي إن قصة المثل واحد من الأغنياء خسر كل فلوسه وثروته ومبقاش لاقي مكان يروحه وواحد فقير استضافه عنده في بيته. الراجل الفقير اشترى في أول يوم مشمش لمراته وولاده وللضيف فالراجل الغني أكل منهم 3 مشمشات بس وساب الباقي. تاني يوم الراجل الفقير اشترى عنب وعزم على الراجل الغني فبدأ ياكل عنقود ورا التاني لدرجة إن صاحب البيت خاف العنب يخلص وميتبقاش حاجة لمراته وولاده فقاله ما تاكل العنب حباية حباية فرد عليه الغني وقاله لاااااا ده في المشمش.. بمعنى إن المشمش هو اللي يتاكل حباية حباية مش العنب.
ونفس القصة دي اتحكت بس بأسلوب تاني أو بصياغة تانية إن فيه اتنين صحاب تجار اشتغلوا مع بعض في بيع الفواكه.. فقرروا أول يوم يبيعوا مشمش فكان واحد منهم مركز في البيع والتاني بياكل فكان الأول مثلا لو باع كيلو مشمش التاني كان بياكل قصادهم كيلو مشمش برضه.. فالأول معجبوش الوضع ده وقال لصاحبه إحنا نبيع عنب بدل المشمش على أساس إن العنب أكله ممكن يبقى أصعب من المشمش بس اتفاجيء تاني يوم إن صاحبه بياكل العنب عنقود ورا التاني فقاله ما تاكل حباية حباية فالتاني رد عليه وقالوا لا يا حبيبي.. حباية حباية ده في المشمش.
ومع مرور الوقت تحولت في المشمش لمثل شعبي وجملة مصرية للتعبير عن صعوبة الحاجة أو استحالتها وفي النهاية لو فاكر
إن إحنا هنقولك مين في كل القصص دي هي القصة الحقيقة للمثل فأحنا حابين نقولك بص على أول كلمتين في عنوان الموضوع.